کوزه
تزه کوزه
تزه سو
تزه ساعات
هئچ بونو سنه دئمه میشدیم
یوباندیم بو گئجه
یوباندیم بو گئجه ائوه گلمه یه
گئجه لری خوش اولور حسرت
کئشکه سنده اولسان یانیمدا
و اواسکی محله ده ن ساوشدوغومدا
چوخ قدیم هاوایدی
اصیل آذربایجان ماهنی سی
ایروان چوخورو چالیردی عاشیق
آلا گؤز اوستوندهن قلم قاشلارین
نه گؤزه ل چکیلیب دارا سو نرگیز
تزه کوزه
تزه سو
تزه ساعات
هئچ بونو دئمه میشدیم سنه
اریندیم بو گئجه
اریندیم بو گئجه ائوه گلمه یه
کئشکه سنده اولسان یانیمدا
گؤرسن
او کیشینی
ییرده ن آیرییدی
آما یاخجی
یاخجی تانیردی بیزلری
چوخ اوزاق دورموشدو
یوز مئتره اولاردی
یوز مئتره اوزاقدا
طیاره ایچینده اوتورموشدو
بیزی دوشونوردو
تام بیزی دوشونوردو
یئنگی محله ده
لاپ او یئنگی محله دن ساووشدوغومدا
لاپ تزه هاوایدی چالیردی
اصیل تبریز دریا سی
اوتاغیما گلمیشدی گئجه لری
یوخومدا دولانیری
بیر کپه نک کیمی باشیمین اوستونه ورولموشدو
بودو بورامدا
آلنیمدا
بیر قوش کیمی چیرپینماق ایسته ییردیم ایچه ری سینه،طیاره نین
و
تزه کوزه
تزه سو
تزه ساعات
هئچ بونو دئمه میشدیم سنه
اوتاندیم بو گئجه
اوتاندیم بو گئجه ائوه گلمه یه
گئجه لری خوش اولور حسرت
گئشکه سنده اولسان یانیمدا
دوداقلاریم
هله آیاقلاریم
سنی دانیشیر
سنی داشییر
چوخ قدیم شهرلرده
رومادا
بیر قادین مغلوب
اولموش اوموزلاریمدا
آیاقلاریم چورومکده
آتدیم –آتدیم
سو ایسته ییر ه م
امپراطورلوقدا
بیرینجی خلیفه دن
بیر آرشین مال آلان چاغیریرام
دونکو محله ده
قابیقلاریما گیر ه ن وار
ملک لر اوچوشور ایچه ریمده
یورقونلامیشام چوخ یورقون
اون دقیقه یوخلاسام
تام دینجه له جه یم درین بیر یئرده
گئجه لرین اورتاسی
تزه کوزه
تزه سو
تزه ساعات
هئچ بونو دئمه میشدیم سنه
دون گله جکدیم
اونوتدوم
فقط
گؤزلریم آغریییر
آیاقلاریم
و بدنیم
هله
قلمیم اوچونوردو اوستومه
اوست- اوسته سن
بیر آز اوتورسان
دینجلسن
یاتسان
اوچ آی گئچه جکدی
و آرتیق
اسگی دگیرماندا
باققالدا
بیر هوس دؤکوله جک
انکارسیز
تانری قوناق گله جک بیزه
بیر چای وئره جه ییک
ملک لره
پیغمبر اولاجاغیق
دانیشمادان
اوزاق آدالاردا یاشاساق
سن ،من
تورپاق
کیمسه یییه بیلمه یه جک سیرریمیزی
سانسورسوز قزئته بوراخاجاغیق
ایکیمیزدن ، اودامیزدان
اویخوموزدان
آنام رقص ائدیردی گؤردوم
آماتورجا
گئجه یاریلاری
منسه
هیجان ایچینده
اوره گیم گؤزومه گیرمیشدی
گؤزلریم اللریمده ایدی
و اللریم باسیلیردی آیاقلاریمین آلتیندا
تام چیگینلریمین اوستونده سن گیزلنمیش
قصد اوزه ریندن
گئنه قیسیرقانیردی اوموزلاریما ساچلارین اللرینی
حالینی بیلمیردی هئچ یئریم
ساعتیم چاشماق اوزه ره ایدی
یئپ-یئنگی
چاشیردی بدنیم
اوساندیم بو گئجه
اوساندیم بو گئجه ائوه گلمه یه
گئشکه سنده اولسان یانیمدا
گئجه لری خوش اولور حسرت
سو نرگیزینده
یوخاری اوتاغیمیزدا
یانیمدا
چوخ قدیم هاوالاردا
رومادا
پرنسس لرین یانیندا
گوز-گوزه
او غریبه ؛او غریبه
اوسو حیوانی
کانگرو
اونون قارنیندا
منیم سکوتومدا
آیلارین ساچلارین داراغیندا
